يارب الكاميرون تكسب الماتش!!!!!!!

نزلت الكليه قال الكل عمال يتوقع مصرحتكسب بكام هدف
وانا اساسا ولا بحب الكوره ولا عايزه مصر تكسب
لان عندى شويه فتور ناحيتها واشمعنى ياعنى الماتش اللى المفروض نكسبه طيب نحقق ذاتنا فى حاجه تستحق المفخره
قالولى تعالى شوفى الماتش معانا وانا عمرى ما شفت ماتش ابدا قلتلهم ماشى
بس حرسم على وشى علم الكاميرون
وكلى قناعه وايمان ان نفسى الكاميرون تكسب
رحنا كلنا عند واحده صاحبتى و اجتماعنا
اول ما الماتش بدأ لاقيت نفسى تلقائى عماله يالا يالا يارب جون
شوط يا متعب صد يا حضرى يالا يا ابو تريكه
مع العلم انى اول مره اعرفهم اساسا كان يوميها ومكنتش اعرف حتى شكلهم ايه
اكتشفت ان مهما بلدنا تعمل فينا بنكابر و نظهر اننا مش بنحبها ونفسنا نجرى نهرب فى اى بلد نحقق فيه ذاتنا
رغم ان العكس صحيح مهما تقسو الام على اولادها حيشتاقو ليها و حيفضلو يحبوها
نزلنا الشارع البلد كلها اعلام الناس كلها بتحب مصر
معقول ياترى ده حب بجد ولا احساس بالكرامه
احساس بأن المصرى موجود و ممكن يكون الاول
يا ترى ده حب بجد ولا كنا محتاجين فرحه من كتر الغم اللى بنشوفه كل يوم
وياترى ليه تعبرنا فى الحب دايما تعبير لحظى
ليه تعبيرنا دايما ليس له تأثير دائم لا ينسى
ليه تانى يوم المصرى اللى كان فى الشارع بيحبها و فرحان جدا
لسه بياخد رشوه....لسه بينجح بالغش ....لسه بياخد منصب ميستحقوش بالواسطه....لسه بيرمى القمامه فى الشارع....لسه خلقه ضيق
ياترى زى ما اجتمعنا على الكوره فى امل نجتمع على احلام تانيه اكبر
والوطن العربى كانت فرحتهم اكبر
ياعنى حقيقى احنا كلنا اخوان و وطن واحد
ياترى اللى حصل ده كان بروباجندا و اخدت مدتها
ولا احنا فعلا بنحب مصر و بنفتخر اننا منها
ياترى احنا بنحب مصر ازاى؟؟